لن اخرس .. حوار من رحم الحصار

أكثر من أسبوعين والبلد ما فيها بنزين ولا سولار ،والغاز شحيح والكهربا مرة بتيجي ومرة بتقطع ، والسوق زى السكين ورطل البندورة صار كيس طحين ، والجامعات واقفة لا شغل ولا مشغلة ، والشباب بتلاقيهم قاعدين على الرصيف بشربوا شيشا "و بقولوا هي هذه عيشة " ، وأنا لسا بمشي .. شفت سواق قاعد بعرفه رديت السلام ...
وسألته : كيف حالك يا ابو فادي .
رد : هو هذا سؤال بنسال .. عيب عليك يا رجل .
قلته : شو كفرنا إحنا .. الحق عليا اللي بطمن عليك .
قلى : يعني أنت مش عارف كيف حالي .. قعدوا ينقوا علينا لحد ما قعدنا .. السيارة واقفة إلها 17 يوم .. لتر السولار صار بــ 30 شيكل .. وفى ناس بتعبي سيرج وكاز ابيض وزيت موتور وأبصر شو.. عشان أتدبر حالها .. وإحنا ما حدا سائل فينا نموت نعيش طز فينا .
قلته : بعين الله يا ابو فادي بدنا نصمد وهذا مصيرنا ،ربنا خلقنا لنقاوم وندافع عن هالامة النايمة .
قلى : يارجل من نكبة 48 لليوم ما صار فينا هيك .. التنظيمات دمرتنا وخربت علينا وضيعت قضيتنا .. على الطلاق انه في الدار ما في شي..ولا عارف كيف بدي أدبر حالي .. إذا مش سالين في بعض كيف بدنا نخلى العالم يسال فينا .... خليها على الله .
قلته : يعني إذا صار اجتياح ما راح تطلع تقاوم .
قلى : عبد بتنكش رأس أنت.. وله لشو بدك تصل فهمني .
قلته : أنا حابب اعرف بس وأنت عرفني يا ابو فادي .
قلى : بشو اطلع أقاوم بجوعي .. وله بظلم اخويا .. وله بصحن فاضي ، وله بسكينة حافية من 10 شهور ما قطعت اللحمة .. وله بحجر مهيون ، وله بسيارتي اللي ما بتساوي ، وله بشو بدك اياني أضحي ولمين .. عشان يطلعوا على ظهورنا زى كل مرة .. إحنا ما بدنا هدول ولا هدول .. وقرفنا الكلام المعسول .. وصدقني اللي جاي أصعب من اليوم .
قلته: ول لهدرجة واصلة معك الحكاية يا ابو فادي .
قلى : لما ما بلاقي الأكل لأولادي والجوع صار فطور وغدا وعشا .. ولما بنسمع علي التلفزيون بتيجي مساعدات .. أنا نفسي اعرف وين بتروح .. ومين أحق مني .. وله لناس وناس الحكاية .. عارف إذا بقينا هيك ،عمروا ربنا ما ينصرنا .
قلته : الحق علينا انه إحنا ساكتين ، أصول ننتفض ونحكي بحرية .
قلي : أي حرية يا عبد أي حرية .. والله خايف احكي عن قضيتنا الفلسطينية ليقولوا معارض ، وخايف اطلع بالشارع ليقولوا بدو يسبب فتنة ، وخايف اطلب بحقي ليقولوا هذا الرجل مجنون ، وخايف احكي على الجوال لأنه مراقب ، وخايف ... عارف أنا خايف من نفسي لأنه اعمل في حالي حاجة .
قلته : لا يا ابو فادي أنت اقوي من هيك .. وعزيمتك اصلب واشد .
قلى : من اللي بنشوفه .. صار إلنا 10 شهور محاصرين ولا حدا بدور علينا .. مش مسلمين هدول .
قلته : صحيح لو في إسلام وفى مسلمين بعرفوا الله لكان حالنا غير هالحال .. بس شو تقول .. ماشى عم ابو فادي بدي أروح .. بدك شي .
قلى : سلامتك الله يسهل عليك .. وما تزعل من كلامي بس بفضفض .. وبجد نفس هالوضع يتغير .. وما تفكر إني ما راح أقاوم لو دخلوا اليهود .. صدقني مش أنا اللي ممكن يخون وطنه .
أيها العرب، استحلفكم بما تبقى في هذه الأمة من طفولة وحب وصداقة وأشجار وطيور وسحب وأنهار وفراشات،استحلفكم بتحية إعلامها عند الصباح وإطراقة جبينها عند المساء، لقد جربتم الإرهاب سنين وقروناً طويلة وها أنتم ترون إلى أين أودى بشعوبكم.
جربوا الحرية يوماً واحداً لتروا كم هي شعوبكم كبيرة وكم هي إسرائيل صغيرة . جربوا أن تنصروا غزة يا فلسطينيين يا عرب يا مسلمين ، لا تنسوا غزة وشعب غزة ، كلنا أمل بكم ، فنحن على يقين أن العزة والكرامة لم تمت بكم ، انتفضوا في وجه الظالم واصنعوا حريتكم بأيديكم .. فانتم امة الملايين وابدوا فخير البدء من فلسطين .